.jpg)
செப் 11 பாட்னா அருகிலுள்ள பர்ஷா பணித்தளத்தில் நடைபெற்ற போஜ்புரி-3 ஊழியர்களுக்கான குடும்பக் கூடுகையினை கர்த்தர் ஆசீர்வதித்தார். இக்கூடுகையில், போதகர் ஜான்சன் ஜாய்சாம் (நாகர்கோவில்) பங்குபெற்று தேவசெய்தி அளித்து ஊழியர்களை உற்சாகப்படுத்தினார். வடக்கு மண்டல ஊழியர்களின் குடும்பங்களுக்காகவும் மற்றும் அவர்களது அனுதின ஊழியங்களுக்காகவும் ஜெபிப்போம்.
செப் 12 கியோட்டி ரன்வே பணித்தளச் சபை கட்டுமானப் பணிகள் தடையின்றி தொடர்ந்து நடைபெறவும், கடந்த நாட்களில் காங்கிரீட் பணிகளை முடிக்கவும் கர்த்தர் உதவிசெய்தார். பணித்தளங்களில் சுகவீனமாக இருக்கும் விசுவாசிகள் விரைவில் சுகம் பெறவும், ஊழியத்திற்கு உண்டாகும் தடைகள் மற்றும் எதிர்ப்புகள் நீங்கவும் ஜெபிப்போம்.
செப் 13 பசோபட்டி பணித்தளத்தில் ஆகஸ்ட் 15 அன்று நடைபெற்ற ஒருநாள் சிறப்புக் கூடுகையில், பணித்தள விசுவாசிகள் 85 பேர் பங்கேற்றனர். இக்கூட்டங்களில், சகோ. தேவபிரகாசம் கர்த்தருடைய செய்தியைப் பகிர்ந்துகொண்டு, பங்கேற்றோரை ஜெபத்தில் வழிநடத்தினார். விசுவாசிகள் ஆவிக்குரிய வாழ்க்கையில் வளரவும், ஆத்தும ஆதாயகர்களாக மாறவும் ஜெபிப்போம்.
செப் 14 பணித்தளங்கள் மற்றும் ஜெம்ஸ் பள்ளிகளில் 80-வது சுதந்திர தினம் சிறப்பாக அனுசரிக்கப்பட்டது. தர்பங்காவின் கோரியா பணித்தளத்தில் நடைபெற்ற சுதந்திர தின விழாவில், சகோதரர் மோசஸ் சிறப்பு விருந்தினராகக் கலந்துகொண்டு, தேசியக் கொடியினை ஏற்றி, மாணவர்களிடையே உரையாற்றினார். மாவட்ட ஆட்சியர் அலுவலகத்தில் மாலை நடைபெற்ற நிகழ்ச்சியிலும் ஜெம்ஸ் பள்ளி மாணவர்கள் பங்கேற்று சிறப்பித்தனர். அரசு அதிகாரிகள் சந்திக்கப்படவும், மாணவர்கள் மற்றும் பெற்றோர் கிறிஸ்துவைக் கண்டுகொள்ளவும் ஜெபிப்போம்.
செப் 15 ஆகஸ்ட் 19 மற்றும் 20 ஆகிய தினங்கள், தர்பங்கா தீமோத்தேயு வேதாகமக் கல்லூரி வளாகத்தில் நடைபெற்ற பேரிடர் விழிப்புணர்வு பயிற்சி முகாமில், மைதிலி-1 மற்றும் மைதிலி-2 கோட்டங்களைச் சேர்ந்த 80 பேர் பங்கேற்று பயனடைந்தனர். BMS World Mission நிறுவனத்தைச் சேர்ந்த சகோ. மோசஸ் ஆண்ட்ரூ, பேரிடர் காலங்களில் சபையின் பொறுப்பு என்ன என்பதனைக் குறித்த பயிற்சியினை அளித்து, கூடவே பல்வேறு ஆலோசனைகளையும் வழங்கினார். பீஹாரின் வட பகுதியில் மழையின் நிமித்தம் அவ்வப்போது பாதிக்கப்படும் கிராமங்கள் மற்றும் ஜனங்களுக்காகவும், அத்துடன் அவர்கள் மத்தியில் செய்யப்பட்டுவரும் ஊழியங்கள் மற்றும் சமுதாயப் பணிகளுக்காகவும் ஜெபிப்போம்.
